Сэтинньи 29 күнүгэр Ырыа куттаах Найахыларга ыалдьыттаата ыраах Таас Дьааҥы эҥсиллэр куоластаах ырыаһыта, олоҥхону айааччы, олоҥхону суруйааччы, утум олоҥхоһут, Дьааҥы биир биллэр олоҥхоһутун Слепцов Гаврил Иннокентьевич — Хаһаах оҕонньор сиэнэ дьиҥ сахалыы тыыннаах кэпсээннээх, айдарыылаах, талааннаах ырыаһыт, олоҥхоһут СЛЕПЦОВА САРГЫЛАНА СЕМЕНОВНА — Хатан Кылаан уонна Бэйдиҥэ сынньалаҥ киинин дириэктэрэ, Олоҥхо ыһыахтарын кыттыылааҕа, призера Игнат Васильевич Слепцов.
Ыалдьыттар бастакытынан үтүө күнү И.И. Гоголев-Дыргыабай аатынан Найахы орто оскуолатыгар экскурсиянан саҕалаатылар. Кинилэри оскуолабыт улахан кылааһын үөрэнээччилэрэ алаадьылаах, саламааты утары уунан истиҥник көрүстүлэр.
Ыалдьыттар оскуола олоҕун, историятын кытта сиһилии дириэктэр Сивцева Мирияна Кононовнаны кытта кэпсэтэн элбэҕи сэҥээрдилэр. Ол курдук үөрэнээччилэр бэйэлэрэ оҥорбут собо балыктан пакеттаах бороьуок миини иһэн олус диэн астыннылар.
Күн иккис чааһа И.И. Артамонов аатынан Найахы сынньалаҥ киинигэр буолла.
Саала сахалыы таҥастаах көрөөччүлэринэн, үөрэнээччилэринэн туолла. Саргылана Семеновна олоҥхо диэн тугун, хайдах толоруллуохтааҕын, олоҥхону кэпсээн, сахалыы ыллаан-туойан дьон интириэһин тарта.
Тэрээһини Найахы сынньалаҥ киинин иһинэн тэриллибит «Дьүрүскэн» хомусчуттар бөлөхтөрө, «Чэчир» оҕо саадын улахан бөлөҕүн иитиллээччитэ Элла Протопопова олоҥхону толорон киэргэттилэр.
Умнуллубат сахалыы тыыннаах күнү бэлэхтээбит ыалдьыттарга, Сахабыт сирин эпоһын — олоҥхону тарҕатааччыларга тэрээһин кыттыылаахтара, үөрэнээччилэр күүстээх ытыс тыаһынан махтаннылар, ситиһиини баҕардылар.
