Ытыктабыллаах Петр Анатольевич, Афанасий Васильевич, Айталы Анатольевна!
Ытыктабыллаах Найахы народнай хорун коллектива!
Саха Өрөспүүбүлүкэтин Ил Түмэнин уонна тус бэйэм ааппыттан улахан ситиһиигитинэн Владивосток куоракка ыытыллыбыт Дальнай Восток регионун хоровой түмсүүлэрин олимпиадаларыгар кыайыылаахтык кыттан боруонса мэтээлинэн наҕараадаламмыккытынан уонна Бүтүн Арассыыйатааҕы хор күрэҕин түһүмэҕэр лауреат аатын ылары ситиспиккитинэн истиҥник эҕэрдэлиибин.
Найахы народнай хора аан бастаан тэриллиэҕиттэн бастакы хормейстер, Саха Өрөспүүбүлүкэтин культуратын үтүөлээх үлэһитэ Семен Гаврильевич Васильев салалтатынан үрдүкү профессиональнай таһымҥа тахсыбыта. Ол таһымҥытын ыһыктыбакка күргүөмнээхтик, айа-үлэлии сылдьаргытынан Саха сирин хоровой искусствотын, саха ырыатын сэҥээрээччи дьон-сэргэ барыта киэн туттар. Эһиги саха ырыатын бүтүн Арассыыйа, Сэбиэскэй Сойуус бастыҥ сценаларыгар иһитиннэрбиккит. Семен Гаврильевич олугун салҕаан кини утумнааччылара Татьяна Никифорова, Иннокентий Готовцев, Светлана Гоголева, Наталья Бочкарева, Елизавета Рожина, Надежда Протопопова, Дмитрий Готовцев, Сардаана Аргунова, Саргылана Михайлова салалталарынан Найахы хора Дальнай Восток, Сибиир, бүтүн Дойду хоровой коллективтарын күрэхтэригэр бастыыр, инники кэккэҕэ тахсар ситиһиилэммитэ.
Күндү доҕоттор, Найахы народнай хорун ырыаһыттара, салайааччылара, Саха уус-уран хоровой искусствотын, культуратын үрдүк таһымын ыһыктыбакка айа-тута, үлэлии-хамсыы сылдьаргытыгар, бэйэҕитигэр, дьиэ кэргэҥҥитигэр кытаанах доруобуйаны, ситиһиилэри, дьолу-соргуну баҕарабын!
Саха Өрөспүүбүлүкэтин Ил Түмэнин Бэрэссэдээтэлин бастакы солбуйааччы А.Н. Жирков