Муус устар 26 күнүгэр Найахы сынньалаҥ киинигэр Саха Өрөспүүбүлүкэтин күнүн көрсө, Дьиэ-кэргэн , Оҕо саас сылларынан «Төрүт сахам тыла» уус-уран ааҕыы күрэҕэ буолан ааста.
Тэрээһин «Уолан» уус-уран ааҕыы бөлөҕүн уолаттарын толоруутугар «Сахам тыла сайдыан баҕарабын, сайдыа диэн бэркэ эрэнэбин!» композицияларынан, Афанасий Новоприезжай Сайа тылларыгар «Төннө туруом дойдубар» ырыатынан өрө көтөҕүллүүлээхтик арылынна.
Күрэххэ уһуйаан иитиллээччилэрэ, оскуола үөрэнээччилэрэ, биирдиилээн улахан дьон, дьиэ-кэргэттэр кыттыыны ыллылар.
Күрэх балаһыанньатын быһыытынан кыттааччылар олохтоох автордар хоһооннорун ааҕан күөс көрүстүлэр.
Ол курдук, Иван Гуляев, Розалия Исакова, Светлана Константинова, Анна Никифорова, Варвара Гуляева, Марфа Федорова норуокка анаан айбыт истиҥ ис хоһоонноох айымньылара үрдүк сыанаттан иһилиннилэр.
Күрэх түмүгүнэн кыайыылаахтарга анал бириис, үрдэл суруктара, бары кыттыылаахтарга туоһу суруктар туттарылыннылар.
Бирииһи олохтоотулар олохтоох дьаһалта, сынньалаҥ киин, оскуола, уһуйаан коллективтара, «Симэх», «Алгыс» общественнай түмсүүлэр , олохтоох модельнай библиотека.
Саха буолан сандааран Найахылар уустаан-ураннаан сахалыы дуораттылар.
