Муус устар 7 күнүгэр үгэскэ кубулуйбут «Найахылар көрсүһүүлэрэ» үтүө күҥҥэ ыраах, чугас олорор биир дойдулаахтарбыт үөрэ-көтө мустан, дойду ахтылҕанын таһааран, истиҥник, ирэ-хоро кэпсэтэн, ыалдьыт буолан, кыттыыны ылан үтүө-мааны күнү бары бииргэ көрүстүбүт.
Бу куҥҥэ Дьокуускай куорат найахылара , Боро5он найахыларын түмсүүлэрэ уонна Найахы нэһилиэгин түмсүүтүн хамаандалара спорт араас көрүҥэр күөн көрүстүлэр.
Ол курдук , волейбол, теннис, саахымат, дуобат, бильярд, дартс, сыал ытыыта, оҕунан ытыы, канат тардыһыытын күрэхтэһиилэрэ дьону-сэргэни түмтэ, сэргэхситтэ.
Тэрээһин киэһээҥҥи өттүгэр спортивнай күрэхтэһиилэр түмүктэринэн кыайыылаахтар үрдүк сыанаттан наҕараадаланнылар үөрүү өрөгөйүн туттулар.
Уопсай түмүккэ:
1 миэстэ — Дьокуускай куорат хамаандата (сал. Изольда Новгородова )
2 миэстэ — Найахы 2 (сал. Гаврил Рожин)
3 миэстэ — Найахы 1 (сал. Петр Слепцов)
Көһөрүллэ сылдьар кубогы Дьокуускай куорат хамаандата ылары ситистэ.
«Дойдум ырыата ыраахтан ыҥырар» түмсүүлэр эҕэрдэ нүөмэрдээх кыттыылаах Найахы кэнсиэрэ бэрт сэргэхтик үрдүк таһымнаахтык ыытыллан дьону-сэргэни сэргэхситтэ.
Сынньалан кииҥҥэ күн устата «Дьиэ — кэргэн олох төрдө» нэһилиэк быыстапката турда. Кэлбит ыалдьыттар, нэһилиэк олохтоохторун хайҕабылын, болҕомтотун тарта.
2024 сыл Дьиэ кэргэн сылынан
Найахылар көрсүһүүлэрэ күрэххэ Дьокуускай
куорат Найахыларын ааттарыттан 11000 тыһ. суммалаах сертификат, спортка көхтөөх дьиэ кэргэҥҥэ Аркадий Семенович, Мария Иосифовна Ушницкайдар дьиэ кэргэннэригэр туттардылар.
Найахылар , биир дойдулаахтар иллээхтик түмсэн, сомоҕолоһон маннык кэрэ кэмнэри өссө да кэрэтик көрсүөхпүт, түмсүөхпүт диэн үөрэ-көтө тарҕастылар.
