Саха АССР култууратын үтүөлээх үлэһитэ, Үлэ Кыһыл Знамя орден кавалера, талааннаах хормейстер Семен Гаврильевич Васильев аатынан Найахы народнай хора тэриллибитэ 60 сылын бэлиэтиир үбүлүөйдээх , киэҥ далааһыннаах күн үрдүк таһымнаахтык буолан ааста.
Найахыларга үбүлүөйдээх күннэригэр СӨ Ил Түмэн судаарыстыбаннай мунньаҕын председателин маҥнайгы солбуйааччыта Жирков А.Н. , Уус-Алдан улууһун баһылыга Аммосов В.И., улуус култууратын управлениятын начальнига Нафанаилов С.С., улуус үөрэххэ управлениятын начальнига Литвинцев С.М. кыттыыны ыллылар.
Үтүө күн бастакы чааһа «Найахы нэһилиэгэ» кинигэ (III,IV томнар) сүрэхтэниитинэн , нэһилиэк историятын үйэтитээччи, Найахы народнай хорун төрүттээччитэ Винокурова М.П. 80 сааһын чиэстээһининэн саҕаланна.
Күн иккис аҥара үөрүүлээх чаастаах кэнсиэр дьону-сэргэни сынньалаҥ киин дьиэтигэр муста. Нэһилиэк салалтатын, сынньалаҥ киин аатыттан Найахы народнай хорун аан маҥнайгы ырыаһыттарыгар , араас сылларга үлэлээбит хормейстердарга, аккомпаниатордарга , хор бары ырыаһыттарыгар , ыалдьыттарга үбүлүөйдээх өйдөбүнньүк бэлэхтэр, сибэкки дьөрбөлөрө туттарылыннылар.
Найахы народнай хорун коллективыгар Жирков А.Н. Найахы хорун историятын үйэтитэргэ көстүүлээх хаартыска- хартыына, Уус-Алдан улууһун салалтатын (харчынан сертификат), култуура управлениятын (харчынан сертификат), найахыларга аан маҥнай ансаамбылы тэрийбит Румянцева А.И. оҕолорун, Дыргыабай аймахтар (60 000 уу харчынан), Семен Васильев таһаарыылаах үлэтин салҕааччы хормейстер Гоголева С.С. оҕолорун , сиэннэрин ,нэһилиэк тэрилтэлэрин ааттарыттан бэлэх туттарылыннылар. Ону таһынан «Симэх» иистэнньэҥнэр түмсүүтүн далбар хотуттара бэйэлэрэ тикпит, Уус-Алдан улууһун картатын көрдөрөр оҥоһуктарын бэлэх ууннулар.
Үбүлүөйдээх тэрээһин Найахы народнай хорун коллектива, араас сыллар хормейстердара, хор солистара кыттыылаах «Найахылар ыллыыллар 60 сыл» улахан кэнсиэринэн түмүктэннэ.
