Муус устар 5 күнүгэр Илья Иванович Артамонов аатынан сынньалаҥ кииҥҥэ сандал сааһы көрсө 2 с төгүлүн ыытыллар
«Ай талаан Куо» кыраһыабай буолуу, талаан уонна дьоҕур күрэҕин түһүлгэтэ дьону түмтэ.
Ол курдук Найахы, Дүпсүн, Бээди оскуолаларын алын кылаас саастаах 11 кыыс күөн көрүстүлэр.
Күрэх сыала-соруга кыыс оҕону кыра эрдэҕиттэн сыанаҕа, дьон иннигэр тутта-хапта сылдьалларын, талааннарын, дьоҕурдарын сайыннарыы, уустаан-ураннаан саҥара үөрэнэллэрин ситиһии буолар.
Күрэх биэс түһүмэҕинэн ыытылынна; бэйэни билиһиннэрии, талаан көрдөрүүтэ, Кыайыы 80 сылын чэрчитинэн «Хартыынаны тыынна» хаартыскаҕа түһүү, авангард, мааны былааччыйа көрдөрүүтэ.
Кырачаан кыргыттар бары даҕаны олус бэлэмнээхтэрин, кэрэлэрин көрдөрдүлэр. Бииртэн биир тупсаҕай , кыраһыабай көстүүлэр олохтоохтору, төрөппүттэри астыннардылар.
Күрэх түмүгүнэн , дьүүллүүр сүбэ быһаарыытынан кыргыттарга барыларыгар анал аат иҥэриллэн, лиэнтэ, диплом уонна Найахы нэһилиэгин тэрилтэлэрэ туруорбут анал бириистэрэ хас биирдиилэригэр туттарылынна.
Ону таһынан үс бастыҥнык , чаҕылхайдык бэйэлэрин көрдөрбүт, кыттыбыт кыргыттарга сынньалаҥ киин аатыттан үгэс быһыытынан хоруона кэтэрдилиннэ.
Кырачаан кыргыттар төрөппүттэрэ, салайааччылара оҕолорун тустарыгар кыһаллан, кэрэни бэлэхтээбиттэрэ норуоту үөрдэр.
Кэлэр 2026 сылга «Ай талаан Куо » күрэх өссө кэҥээн улуус иһинэн ыытыллара былааннанна.
Кыыс оҕо кэрэтин, намчытын, сибэкки курдук кыраһыабайын , бары өттүнэн талааннааҕын бу сир үрдүгэр үрдүктүк тутан, харыстаан, кэрэҕэ иитиэҕиҥ!
