Кулун тутар 22 күнүгэр сандал саас кэлиитин көрсө Найахы нэһилиэгэр үгэскэ кубулуйбут төрдүс төгүлүн ыытыллар «Найахылар көрсүһүүлэрэ» ахтылҕаннаах тэрээһин буолан ааста.
Ол курдук, биир дойдулаахтар Дьокуускайга , Бороҕоҥҥо олорор найахылар уонна олохтоох найахылар хамаанда тэринэн «Тиит Буурай» спорт заалга тоҕус көрүҥэр волейболга, остуол тенниһыгар, дарст, сыал ытыыта, оҕунан ытыыга, бильярд, дуобакка, саахыматка уонна хомуур күрэҕэр күөн көрсөн, күрэхтэһэн дуоһуйа астыннылар.
Күрэхтэһии түмүгүнэн Найахы бастакы хамаандата 1 миэстэ,
Найахы иккис хамаандата 2 миэстэ,
Дьокуускай найахылара 3 миэстэ,
Бороҕон Найахылара 4 миэстэ ыларга ситистилэр.
Тэрээһин иккис чааһа кулууп дьиэтигэр күрэхтэһии түмүгүн таһаарар наҕараадалааһынан саҕаланна. Кэлбит спортсменнар бары түөстэригэр кэтэр мэтээллээх, грамоталаах тигистилэр.
Көһөрүллэ сылдьар кубок Найахы хамаандатыгар туттарылынна. Ол кэннэ сомоҕолоһуу кэнсиэрэ ыытыллан дьону-сэргэни сэргэхситтэ.
Кэнсиэргэ Найахыбыт талааннаах ырыаһыттара Евдокия Фомина, Айталы Новоприезжая, Юлия Андросова, Арсен Кривошапкин, Уйгулаана Матвеева ырыалара олус бэккэ ылланан көрөөччүнү астыннардылар.
Дойдуларын ахтан кэлбит күрэхтэһээччилэргэ хомус дьүрүскэн тыаһын бэлэхтээтилэр Алена Макарова, Уйгулаана Матвеева.
Дьокуускай найахыларын хамаандатын аатыттан Тускун Федоров сэргэх ырыатынан, Анатолий Федоров истиҥ «оҕо саас оонньуутун» ырыатын биир дойдулаахтарыгар бэлэх уунан ытыс дохсун тыаһын ыллылар.
Кэнсиэри Бороҕон найахыларын хамаандатын талааннаах ырыаһыта, өрүү дьон биһирэбилин ылар Николай Федоров сэргэх, тэтимнээх ырыанан түмүктээтэ.
2026 сылга үбүлүөйдээх тэрээһин буоларын Найахылар былааннаатылар, кэлэр сыл өссө үрдүк таһымҥа ааһарыгар бары алгыс тылын бэйэ-бэйэлэригэр анаатылар.
Тэрээһин олохтоох найахылар бэлэмнээбит минньигэс астаах фуршет остуолунан түмүктэннэ.
