Тохсунньу 16 күнүгэр Илья Иванович Артамонов аатынан сынньалаҥ киинигэр Найахы уонна Дүпсүн нэһилиэктэрин ветераннара саҥа дьыллааҕы тэрээһиннэрэ бэрт сэргэхтик ааста.
Тэрээһини оҕо саастарын санатан Тымныы оҕонньор торуоскатын тыаһатан саҥа дьыллааҕы эҕэрдэтинэн саҕаланна.
Ветераннар бэйэ-бэйэлэригэр эҕэрдэ, алгыс тылларын анаатылар, ырыа-тойук, үҥкүү тула үөрэ-көтө оонньоон көрүстүлэр.
Сынньалаҥ киин специалистара Афанасий Новоприезжай, Айталы Новоприезжая, Юлия Андросова уонна уус-уран самодеятельность актыыбынай кыттыылааҕа Эдуард Марков сэргэх ырыаларынан тэрээһини киэргэттилэр.
Сылга дэҥ-дэҥ көрсөр үөлээннээхтэр хореограф Гаврильева Алена Васильевна флэшмоб үҥкүүтүгэр бары биир киһи курдук тэтимнээх музыкаҕа үҥкүүлээн сэргэхсийдилэр.
Найахы ветераннарын түмсүүтүн актыыбынай кыттыылааҕа, педагогическай үлэ ветерана Константинова Мария Саввична бэрт интириэһинэй массовай, хамаандаларынан конкурстары, күрэхтэһиилэри оонньотон дьонун-сэргэтин үөртэ.
«Симэхтэр» түмсүү далбар хотуттара коллективынан саҥа дьыллааҕы настарыанньа биэрэн мааскаланан кэлбиттэрэ сэдэх көстүү буолла.
Ыалдьыттарбыт Дүпсүн нэһилиэгин далбар хотуттара имигэс хамсаныылаах үҥкүүлэринэн, ырыаларынан олохтоохтору сэргэхситтилэр.
Нэһилиэкпит эр дьон ветераннара хас биирдии оонньууларга актыыбынайдык кыттыыны ыллылар, эҕэрдэ тылларын кэрэ аҥардарга анаатылар.
Олохтоох администрация специалистара, нэһилиэк ветераннарын түмсүүтэ хас биирдии ыалдьыты минньигэс астарынан, итии чаайдарынан , бириистэринэн күндүлээтилэр.