Бэс ыйын 1 күнэ — Аан дойдуга оҕо көмүскэлин күнэ.
Бу күн Найахыга олус сэргэх умнуллубат күн буолан ааста.
Ол курдук , күнүскү өттүгэр И. И. Артамонов аатынан сынньалаҥ киин коллектива уонна ыччат түмсүүтүн активистара оскуола саастаах оҕолорго
» Улахаттар уонна кыралар» хамаанданан станцияларынан квест оонньууну ыраас халлаан анныгар кулууп дьиэтин территориятыгар тэрийэн оҕолорго бэрт үчүгэй бэлэҕи оҥордулар.
Хас биирдии станция оонньуулара оҕолорго интириэһинэйдик, көхтөөхтүк ааста.
Бырааһынньыгынан хас биирдии оҕо минньигэс илии тутуурдаах тарҕастылар.
Онтон салгыы киэһэ өттүгэр «Чэчир» оҕо саадын иитиллээччилэрин «Ойор-тэбэр оҕо саас» кэнсиэрэ буолан ааста.
Кырачаан оҕолор сэргэх ырыалара, үҥкүүлэрэ көрөөччүнү сэргэхситтилэр.
Кэнсиэр иннинэ сыл түмүгүнэн улууска, республикаҕа, ону таһынан кэтэхтэн всероссийскай таһымнаах конкурстарга кыттыыны ылбыт кыайыылаах, ситиһиилээх иитиллээччилэргэ анал ааттар, грамоталар туттарылыннылар.
Оҕо-аймах кэнсиэрэ быйыл олус таһымнаахтык, уратылаахтык ыытыллынна.
Ол курдук, педагог уонна наставник сылынан уһуйаан иитээччитэ уонна иитиллээччитэ диэн дуэтынан номердары көрдөрөн дьон биһирэбилин ыллылар.
Оҕо кыра сааһыттан бары өттүнэн сайдыытыгар, кэрэ эйгэҕэ тардыллан , талаанын арыйарыгар, дьон иннигэр улахан сыанаҕа тахсарыгар уһуйаан иитээччилэрэ болҕомтолорун уураллара, иитэн-үөрэтэн таһаараллара хас биирдии төрөппүккэ үөрүүлээх быһыы буолара бу кэнсиэргэ көһүннэ.
Өссө төгүл Найахыбыт нэһилиэгин бары оҕолорун, төрөппүттэри бырааһынньыгынан эҕэрдэлиибит.
Дьоллоох, кэрэ олоҕу баҕарабыт!
