Тохсунньу 23 күнүгэр
Илья Иванович Артамонов аатынан Найахы сынньалаҥ киинигэр үгэскэ кубулуйбут сыл түмүгүнэн ситиһиилээх оҕолорго «Успех-2025» анал ааттар туттарыылаах оҕо-аймах кэнсиэрэ өрө көтөҕүллэн, үрдүк таһымҥа ааста. Кэнсиэри «Чэчир» уһуйаан уонна Найахы орто оскуолатын оҕолоро уопсайа 91 кыттыыны ыллылар.
Оҕо-аймах түһүлгэтин оскуола 10 кылааһын Нюргуяна Чыймыева, 11 кылааһын Данил Яковлев үөрэнээччилэрэ иилээн-саҕалаан саҥаран ыыттылар.
Сыл түмүгүнэн үҥкүүгэ үрдүк ситиһиилээх «Көлүкэчээн», «Долун» ансаамбыллара, ырыаҕа 2, 3 кылаас үөрэнээччилэрэ, биирдиилээн ыллыыр ситиһиилээх оҕолор, «Уолан» бөлөх хоһоон ааҕааччы уолаттар, ырыаҕа, үҥкүүгэ, хоһооҥҥо ситиһиилээх «Чэчир» уһуйаан кырачаан иитиллээччилэрэ көрөөччүнү астыннардылар. Оҕолору кэрэ эйгэҕэ уһуйар салайааччыларынан буолаллар: «Чэчир» уһуйаан музыкаҕа иитээччитэ Арсентьева Л.К., иитээччи-салайааччылар
Гуляева В.М., Акакиева А.В., Рожина М.Н., Найахы орто оскуолатын алын сүһүөх учуутала, музыка учуутала Аргунова С.А., саха тылын уонна литературатын учуутала Федорова А.Н., ветеран учуутал Мухина В.П., Найахы сынньалаҥ киинин исписэлиистэрэ Гаврильева А.В., Гаврильева А.С., Новоприезжий А.В.
Сылын аайы Найахы сынньалаҥ киинэ тэрийэн ыытар бырайыага хас биирдии оҕолорго, салайааччыларга өссө үүнэн, сайдан, үрдүк ситиһиилэнэллэрин кынаттыыр.
Хас биирдии оҕо коллективыгар, биирдиилээн талааннаах оҕолорго, салайааччыларга бырайыак аатыттан «Успех» анал кубок уонна дипломнар туттарылыннылар.
Кэнсиэр «Өрүү баар буоллун КҮН!» ырыанан өрө көтөҕүллэн түмүктэннэ.
