Олунньу 7 күнүгэр Илья Иванович Артамонов аатынан Найахы сынньалаҥ киинигэр А.Д. Макарова аатынан Дьокуускайдааҕы культура уонна искусство колледжын хореография салаатын үһүс куурсун устудьуона Айыына Алексеева «Кэрэттэн тыллыы» отчуоттуур кэнсиэрэ үрдүк таһымҥа ыытылынна.
Үҥкүү түһүлгэтигэр «Көлүкэчээн» , «Долун», «Эрчим», «Чэлгийээнэ» үҥкүү кэллэктииптэрэ, уопсайа 64 кыттааччы кытынна.
Биир ый кэмигэр кэллэктииптэргэ барыларыгар араас омук, аныгылыы уонна сахалыы хамсаныылар ситимнэнэн, эдэр эрчимнээх үҥкүүлэр туруоруллан , бииртэн биир кэрэ көстүүлэр көрөөччүнү астыннардылар.
Эдэр талааннаах Айыынаҕа үөрэҕин практиката, отчуоттуур кэнсиэрэ үрдүк сыанабылга ааспытын бэлиэтээн, махтанан Найахы сынньалаҥ киинэ , «Чэлгийээнэ» , «Эрчим», эҕэрдэ суруктары, сэмэй бэлэхтэри туттардылар. Сиэнин үлэтин, кэнсиэрин көрөн астыммыт санаатын үллэстэ алгыс тылынан эбэтэ Аграфена Федотовна эҕэрдэлээтэ.
Кэнсиэр үҥкүүһүт оҕолор эдэр хореографка, салайааччыларыгар долгуйан туран истиҥ махтал тылларынан түмүктэннэ.
